मोरङको सिरिजंगा स्पोर्टिङ क्लब इलामको माङसेबुङमा जारी आत्मानन्द गोल्डकप फुटबल प्रतियोगिताको फाइनल प्रवेश गरेको छ।
माङसेबुङ गाउँपालिका-५ स्थित आत्मानन्द रंगशालामा मंसिर १३ गते भएको १८औं संस्करणको आत्मानन्द गोल्डकपको पहिलो सेमिफाइनल खेलमा झापाको दुधे युथ क्लबलाई २-१ गोलले पराजित गर्दै पथरीशनिश्चरे नगरपालिकाको सिरिजंगा स्पोर्टिङ क्लब फाइनल प्रवेश गरेको हो। शिवसताक्षी नगरपालिकाको दुधे युथ क्लब गत वर्षको विजेता टिम हो।
खेलको पहिलो हाफमा दुधेका निमा लामाले १९औं मिनेटमा गोल गरी टिमलाई अग्रता दिलाएका थिए। तर‚ दुधेले दोस्रो हाफमा अग्रता जोगाउन सकेन। दोस्रो हाफको ४३ मिनेटमा सिरिजंगाका सञ्जय घिमाल गोल गर्दै खेललाई बराबरीमा ल्याए। ५२ मिनेटमा सिरिजंगाका सौरभ सुब्बाले गोल गर्दै टिमलाई विजयी गराए। आजको प्रतियोगितामा सिरिजंगाका सौरभ सुब्बा म्यान अफ द म्याच घोषित भएका छन्।
मंसिर १४ गते हुने दोस्रो सेमिफाइनल खेल झापाको दमक भाङबारी स्पोर्टिङ क्लब र मोरङको लेटाङ फुटबल क्लबबीच हुनेछ। प्रतियोगिताको फाइनल मंसिर १७ गते हुनेछ।
किरात धर्मगुरु आत्मानन्द लिङ्देनको ७२औं जन्मोत्सवको अवसरमा आयोजित प्रतियोगितमा आठ टिम सहभागी थिए। प्रतियोगितका विजेताले नगद ३ लाख ११ हजार १७२ र उपविजेताले २ लाख ११ हजार १७२ रुपैयाँका साथ ट्रफी र मेडल प्राप्त गर्ने छन्।
प्रतियोगितामा सर्वाधिक गोलकर्ता, उत्कृष्ट गोलकिपर, उत्कृष्ट फरवार्ड, उत्कृष्ट खेलाडी र उत्कृष्ट डिफेन्सलाई जनही ८ हजार १७२ रुपैयाँका साथ ट्रफी प्रदान गरिने छ। यसैगरी उदीयमान खेलाडी, उत्कृष्ट कोचले जनही ८ हजार १७२ रुपैयाँका साथ ट्रफी र मेडल प्राप्त गर्ने छन्। साथै प्रत्येक खेलका म्यान अफ् द म्याचले ५ हजार १७२ प्राप्त गर्ने छन्।
तस्बिरहरूः योगेश लाओती
