इलामको माङसेबुङमा जारी १८औं संस्करणको आत्मानन्द गोल्डकप फुटबल प्रतियोगिताको सेमिफाइनलमा दुधे युथ क्लब प्रवेश गरेको छ। झापाको दुधेले भारतको सिलिगुडी कञ्चनजंगा फुटबल क्लवलाई ७-२ गोलको फराकिलो अन्तरले पराजित गर्दै सेमिफाइनल प्रवेश गरेको हो।
खेलको पहिलो हाफमा दुधेका प्रदिप बुढाथोकी र निमा तामाङले दुई-दुई गोल गरेर टिमलाई अगाडि राखेको थियो। दोस्रो हाफमा सिलिगुडीका पुजन सुब्बा र अभिषेक ठकुरीले एक–एक गोल गरेका थिए। तर‚ निमा‚ प्रदिप र संजोक मगरले एक–एक गोल गरेर दुधेको ७ गोल बनाएका थिए। दुधे युथ क्लबका निमा तामाङ म्यान अफ द म्याच घोषित भएका छन्।
दुधेले मंसिर १३ गते हुने पहिलो सेमिफाइलनमा मोरङको सिरिजंगा स्पोर्टिङ क्लबसँग खेल्ने छ। मंसिर १० गतेको खेल युथ अफ माङसेबुङ‚ इलाम र दमक भाङबारी स्पोर्टिङ क्लब‚ झापाबीच हुनेछ।
किरात धर्मगुरु आत्मानन्द लिङ्देनको ७२औं जन्मोत्सवको अवसरमा आयोजित प्रतियोगितमा आठ टिम सहभागी छन्। प्रतियोगितका विजेताले नगद ३ लाख ११ हजार १७२ र उपविजेताले २ लाख ११ हजार १७२ रुपैयाँका साथ ट्रफी र मेडल प्राप्त गर्नेछन्।
प्रतियोगितामा सर्वाधिक गोलकर्ता, उत्कृष्ट गोलकिपर, उत्कृष्ट फरवार्ड, उत्कृष्ट खेलाडी र उत्कृष्ट डिफेन्सलाई जनही ८ हजार १७२ रुपैयाँका साथ नगर र ट्रफी प्रदान गरिने छ। यसैगरी उदीयमान खेलाडी, उत्कृष्ट कोचले जनही ८ हजार १७२ रुपैयाँका साथ ट्रफी र मेडल प्राप्त गर्ने छन्। साथै खेलका म्यान अफ् द म्याचले ५ हजार १७२ प्राप्त गर्नेछन्।
तस्बिरहरूः योगेश लाओती
