मोरङको लेटाङ फुटबल क्लब आत्मानन्द गोल्डकप फुटबल प्रतियोगिताको फाइनल प्रवेश गरेको छ।
इलामको माङसेबुङ गाउँपालिका-५ स्थित आत्मानन्द रंगशालामा मंसिर १४ गते सम्पन्न दोस्रो सेमिफाइनल खेलमा लेटाङले झापाको दमक भाङबारी स्पोर्टिङ क्लबलाई २-० गोल अन्तरले पराजित गर्दै फाइनल प्रवेश गरेको हो। लेटाङका लागि निरज परियारले दुई गोल गरेका थिए। दमक भाङबारीका लागि अफ्रिकन खेलाडी रिचार्ड विन्शनले जवाफी एक गोल गरेका थिए। आजको खेलमा लेटाङका निरज परियार म्यान अफ द म्याच घोषित भएका छन्।
मंसिर १७ गते हुने फाइनलमा मोरङको दुई टिम सिरिजंगा स्पोर्टिङ क्लब र लेटाङ फुटबल क्लबबीच प्रतिस्पर्धा हुने भएको छ। मंसिर १३ गते भएको पहिलो सेमिफाइनलमा सिरिजंगा फाइनल प्रवेश गरेको थियो। सिरिजंगा‚ पथरीशनिश्चरे नगरपालिका र लेटाङ‚ लेटाङ नगरपालिकाको क्लब हो।
किरात धर्मगुरु आत्मानन्द लिङ्देनको ७२औं जन्मोत्सवको अवसरमा आयोजित प्रतियोगितमा आत्मानन्द गोल्डकपको १८औं संस्करणमा आठ टिम सहभागी थिए। प्रतियोगितका विजेताले नगद ३ लाख ११ हजार १७२ र उपविजेताले २ लाख ११ हजार १७२ रुपैयाँका साथ ट्रफी र मेडल प्राप्त गर्ने छन्।
प्रतियोगितामा सर्वाधिक गोलकर्ता, उत्कृष्ट गोलकिपर, उत्कृष्ट फरवार्ड, उत्कृष्ट खेलाडी र उत्कृष्ट डिफेन्सलाई जनही ८ हजार १७२ रुपैयाँका साथ ट्रफी प्रदान गरिने छ। यसैगरी उदीयमान खेलाडी, उत्कृष्ट कोचले जनही ८ हजार १७२ रुपैयाँका साथ ट्रफी र मेडल प्राप्त गर्ने छन्। साथै प्रत्येक खेलका म्यान अफ् द म्याचले ५ हजार १७२ प्राप्त गर्ने छन्।
